То 4 октябр дар Тоҷикистон 340 ҳазору 941 тонна мева, аз ҷумла 92 ҳазору 538 тонна ангур ҷамъоварӣ карда шуд.
Майдони умумии боғу токзорҳо дар кишвар 206 ҳазору 535 гектарро ташкил медиҳад, ки аз он 39 ҳазору 922 гектарро токзорҳо ишғол мекунанд.
То 1 август 495 гектар боғ ва 25,8 гектар токзор бунед карда шуд, инчунин 219 гектар боғ ва 32,5 гектар токзор барқарор карда шуд.
30 сентябр таҳти раесати Президенти Ҷумҳурии Тоҷикистон, Пешвои миллат ва Раиси Ҳукумати Ҷумҳурии Тоҷикистон Муҳтарам Эмомалӣ Раҳмон ҷаласаи Навбатии Ҳукумат баргузор гардид. Дар ин ҷаласа «Барномаи рушди боғдорӣ, токпарварӣ ва ситруспарварӣ дар Ҷумҳурии Тоҷикистон барои солҳои 2025-2029» кабул гардид.
Барнома ба рушди минбаъдаи боғдорӣ ва токпарварӣ равона шудааст, ки дар навбати худ бояд ба таъмини аҳолӣ бо маҳсулоти хӯрокворӣ, корхонаҳо бо ашеи хом, афзоиши иқтидори содиротӣ ва коҳиши вобастагии бозори озуқаворӣ аз маҳсулоти воридотӣ мусоидат кунад.
Дар ин бора ба АМИТ «Ховар» бо истинод ба Вазорати кишоварзии ҷумҳурӣ хабар медиҳад.
Акс: аз манбаъҳои кушода
