Тоҷикистон ва Русия дар мавриди густариши содироти маҳсулот аз Тоҷикистон ба Русия ба мувофиқа расиданд. Дар ин бора баъд аз мулоқоти муовини аввали вазири рушди иқтисод ва савдои Тоҷикистон Ашӯрбой Солеҳзода ва муовини вазири рушди иқтисоди Федератсияи Русия Дмитрий Волвач дар Форуми байналмилалии иқтисодии Санкт-Петербург (ФБИСП) хабар дода шуд.
Гуфта мешавад, ҷонибҳо ҷалби сармояи Русия ба иқтисоди Тоҷикистонро низ баррасӣ кардаанд. Дар мулоқот раиси Кумитаи рушди сайёҳии Тоҷикистон Камолиддин Мӯъминзода ва муовини раиси Кумитаи сармоягузорӣ ва идораи амволи давлатӣ Хуршеда Қодирӣ иштирок намуда, барои рушди ҳамкориҳо пешниҳодҳои худро ироа намуданд.
Вазорати рушди иқтисоди Тоҷикистон таъкид кард, ки Русия бузургтарин шарики тиҷоратии ҷумҳурӣ буда, дар тӯли даҳ сол дар сохтори гардиши тиҷорати хориҷии кишвар мақоми аввалро ишғол мекунад. Дар соли 2023 гардиши мол миёни ду кишвар ба ҳадди таърихии тақрибан 1,8 миллиард доллар расид. Дар чор моҳи аввали соли 2024 гардиши мутақобила нисбат ба ҳамин давраи соли гузашта беш аз 24 фоиз афзуда, 636,8 миллион долларро ташкил дод. Дар ҳамин ҳол, бино ба маълумоти Агентии омори назди президенти Тоҷикистон, воридот аз Русия ба таври қобили мулоҳиза нисбат ба содирот зиёд аст: дар чаҳор моҳи соли 2024 Русия ба маблағи ҳудуди 600,7 миллион доллар коло ворид кардааст ва содирот ба Русия 36,1 миллион долларро ташкил додааст.
ТАСС хабар медихад.
Акс: аз манбаъҳои кушода
