Дар муассисаҳои хӯрокхӯрии умумӣ, марказҳои савдо, бозорҳо ва дигар ҷойҳои хӯрокхӯрии ҷамъиятии ноҳияи Ашт назорати эпидемиологӣ гузаронида шуд. Мақсади он сари вақт ошкор кардани қонуншиканиҳои марбут ба аз фурӯш баровардани консервҳои дар хона омодашуда мебошад.
Мониторинг аз ҷониби мутахассисони маркази Давлатии назорати санитарӣ-эпидемиологии вилояти Суғд гузаронида шуд.
Ҳамчунин дар байни сокинони ноҳия сӯҳбатҳо ва вохӯриҳо барои пешгирии заҳролудшавӣ аз хӯрок ва оқибатҳои он гузаронида шуданд.
Барои пешгирии садамаҳо ва риояи шароити технологии тайер кардани консервҳо дар хона, инчунин пешгирӣ аз хуруҷи сироятҳои ғизоӣ, аз ҷумла ботулизм, роҳбарияти Маркази назорати давлатии санитарӣ-эпидемиологии вилояти Суғд бо кормандони Маркази назорати давлатии санитарӣ-эпидемиологии ноҳияи Ашт мулоқот анҷом доданд.
Ба масъалаҳои пешгирии бемориҳои сироятӣ, фаъолгардонии корҳои фаҳмондадиҳӣ дар байни аҳолӣ дар арафаи Соли Нав ва дигар мавзӯъҳои мубрам диққати махсус дода шуд.
АМИТ «Ховар» бо истинод ба Вазорати тандурустӣ ва ҳифзи иҷтимоии аҳолии кишвар хабар медиҳад.
Акс: аз манбаъҳои кушода
