«Мушкилоти муосири амниятӣ аз мо на танҳо азми қавӣ, балки қобилияти ҳамкорӣ дар сатҳи ҷаҳонро талаб мекунанд. Танҳо ба шарофати ҳамкории зич ва мутақобилаи байни кишварҳо мо метавонем терроризм ва оқибатҳои онро бартараф намоем», — президенти Ҷумҳурии Тоҷикистон муҳтарам Эмомалӣ Раҳмон дар конфронси Байналмилалӣ «Таҳкими ҳамкориҳои байналмилалӣ дар мубориза бо терроризм ва ташкили механизмҳои самараноки амнияти марзҳо – марҳилаи Кувайтии «Раванди Душанбе» – ро қайд намуданд.
Сарвари давлат таъкид карданд, ки таҳдидҳои амнияти байналмилалӣ, аз қабили терроризм, экстремизм, ҷинояткории муташаккили фаромиллӣ, қочоқи маводи мухаддир ва киберҷиноят муҳим боқӣ мемонанд.
«Илова ба мубориза бо ин мушкилот, мо бояд ҳамоҳангсозии кӯшишҳои худро барои таҳкими сулҳ, субот ва амният тақвият диҳем», — гуфт Эмомалӣ Раҳмон. Дар ин замина, мубодилаи иттилоот ва таҷрибаи пешқадам калидӣ хоҳад буд.
Таҳкими ҳамоҳангсозии амалиет дар сатҳи минтақавӣ ва ҷаҳонӣ, инчунин ташкили механизмҳои муассир барои вокуниши зуд ба хатарҳо ва таҳдидҳои амниятӣ ба муборизаи муштарак бо ин таҳдидҳо мусоидат хоҳад кард.
Тоҷикистон ҷонибдори қабули Конвенсия оид ба мубориза бо терроризми байналмилалӣ мебошад. Ба гуфтаи президент, муҳим аст, ки раванди гуфтушунид оид ба ин масъала ҳарчи зудтар ба анҷом расад.
АМИТ «Ховар» бо истинод ба хадамоти Матбуоти Президенти Ҷумҳурии Тоҷикистон хабар медиҳад.
Акс: Хадамоти Матбуоти Президенти Ҷумҳурии Тоҷикистон
