Аз 26 то 28 июн дар Санкт-Петербург форуми 12-уми байналмилалии ҳуқуқӣ баргузор шуд. Дар он намояндагони идораҳои давлатӣ, мақомоти ҳифзи ҳуқуқи кишварҳои ИДМ ва дигар давлатҳо иштирок карданд.
Аз Ҷумҳурии Тоҷикистон дар форум прокурори генералӣ, вазири адлия, раиси суди олии иқтисодӣ ва дигар шахсони расмӣ иштирок намуданд.
Дар доираи форум павильони намоишӣ ташкил карда шуд, ки дар он дастовардҳои нави мақомоти давлатии Федератсияи Русия, инчунин роҳҳои инноватсионии ҳалли вазифаҳо ва масъалаҳои муҳим пешниҳод карда шуданд.
Намояндагони Вазорати корҳои дохилӣ усулҳои омӯзиши гузаронидани экспертизаҳои судӣ ва воситаҳои муосири криминалистиро пешниҳод карданд, ки ба тафтиши самараноки ҷиноятҳо ва ошкор кардани шахсони гунаҳкор кӯмак мерасонанд.
НИАТ «Ховар» бо истинод ба маркази матбуотии прокуратураи Генералии Ҷумҳурии Тоҷикистон хабар медиҳад.
Акс: Прокуратураи Генералии Ҷумҳурии Тоҷикистон
