18 июни соли 2024 дар Хонаи адибони Эрон бо ибтикори маҷаллаи «Бухоро» ва мусоидати Сафорати Тоҷикистон дар Эрон «Шоми устод Садриддин Айнӣ» баргузор гардид.
Чорабиниро сармуҳаррири маҷаллаи «Бухоро» Алӣ Деҳбошӣ ифтитоҳ намуд. Вай ба омӯзиши рӯзгор ва осори устод Садриддин Айнӣ дар Эрон ба унвони яке аз маъруфтарин шахсиятҳои ҷаҳони форсизабон таъкид кардааст.
Сафири Тоҷикистон дар Эрон Низомиддин Зоҳидӣ зикр кард, ки Садриддин Айнӣ таҷассуми ҳастии маънавии тоҷикон аст. Ӯ мероси устодро ҷавҳари дастовардҳои илму адаб ва фарҳанги мардуми тоҷик дар садаи 20 хонд. Сафир нақши фарзанди фарзонаи миллати тоҷикро дар ҳифзи ҳувияти миллӣ ва арзишҳои фарҳангии халқаш дар даврони тақдирсози таърихи тоҷикон таъкид кард.
Дар ин бора аз Вазорати корҳои хориҷии Ҷумҳурии Тоҷикистон хабар доданд.
Акс: ВКД ҶТ
