Дар пайи баланд шудани ҳарорати миёнаи шабонарӯзии ҳаво ва аз ҳад зиёд об шудани барф дар як қатор ноҳияҳои кӯҳистонии вилояти Суғд, навоҳии тобеи ҷумҳурӣ ва дар ғарби Вилояти Мухтори Кӯҳистони Бадахшон то 24 апрел рафъ шудани селҳои пиряхӣ пешбинӣ шудааст.
Тайи 24 соати охир дар шимолу ҷануби кишвар дар натиҷаи боришоти шадид омадани сел ва сангрезиҳо ба қайд гирифта шудааст.
Рӯзи 22 апрел дар шоҳроҳи Хуҷанд-Истиқлол, дар наздикии корхонаи «ХуаксинГаюрСуғд Семент» пеш аз ворид шудан ба шаҳри Истиқлоли вилояти Суғд сел ба амал омад. 4 резиши санг ба қайд гирифта шудааст. Бо ёрии техникам инженерй рох тоза ва харакати наклиёт баркарор гардид.
Рӯзи 22 апрел бар асари боришот аз ҷониби Ҷумҳурии Қирғизистон омадани сел ба амал омад, ки дар натиҷа сарбанди муҳофизи деҳаи Қӯрғончаи ҷамоати деҳоти Ҳаёти нав Ҷаббори ноҳияи Расулови вилояти Суғдро ба масофаи 25 метр шуста бурд.
Ҳамчунин аз ҷониби Бобоҷони ноҳияи Ғафуров ба ҳудуди маҳаллаҳои Ганҷобод ва Меҳрободи деҳаи Суғдиёни ноҳияи Мастчии вилояти Суғд сел ҷорӣ шуд. Дар натиҷа 5 гектар замини корам ва 20 қитъаи замини наздиҳавлигии сокинони маҳаллӣ қисман осеб дидааст.
Бар асари боришоти шадид дар деҳаи Чилчаи ҷамоати деҳоти Чилчаи ноҳияи Темурмалик сел омад. Дар натиҷа 22 иншооти ёрирасони сокинони маҳаллӣ зери об мондааст.
Дар маҳалҳо комиссияҳои минтақавии ҳолатҳои фавқулодда кор карда, корҳои бартарафсозии оқибатҳои офати табиӣ идома доранд. Бар асари омадани сел ва сангрезиҳо талафот ва харобиҳо ба мушоҳида нарасидааст.
Дар ин бора ба АМИТ «Ховар» бо истинод ба Агентии обуҳавошиносии кишвар хабар медиҳад.
Акс: аз архив
