Ноҳияҳои Олмон аз Берлин талаб доранд, ки вуруди паноҳандагон аз Украина ба ин кишварро ба далели имконнопазирии ҷойгиронии онҳо қатъ кунад. Дар ин бора президенти Ассотсиатсияи округҳои Олмон Райнхард Загер изҳорот дод.
«Баъзе минтақаҳо ва шаҳракҳо аз муҳоҷирати қонунӣ ва ғайриқонунӣ осеб дидаанд. Интегратсияи ҳамаи ин одамон дигар имконнопазир аст. Мушкилот торафт зиёд мешавад», — иқрор шуд Загер дар мусоҳиба бо рӯзномаи Die Welt.
Ба навиштаи нашрия, намояндагони навоҳии Олмон ба таври фаврӣ аз Берлин ва Иттиҳодияи Аврупо хостаанд, ки барои мубориза бо афзоиши муҳоҷират ва ҳамчунин қатъи ҷараёни паноҳандагон чора андешанд. Ба гуфтаи Сагер, дар як худи Баден-Вюртемберг дар ҳоли ҳозир назар ба тамоми Фаронса ду баробар бештар мардуми Украина зиндагӣ мекунанд.
Филиппо Гранди, Комиссари олии СММ дар умури паноҳандагон қаблан хабар дода буд, ки тайи ду соли ахир 6,3 миллион нафар, яъне тақрибан шашяки аҳолии ин кишвар – Украинаро тарк кардаанд. Кишварҳои Иттиҳодияи Аврупо дар навбати худ шароит барои муҳоҷирони украиниро сахттар мекунанд. Мақомот дар минтақаҳои мухталифи Олмон аз он шикоят мекунанд, ки украиниҳо кор пайдо карда наметавонанд ва ё намехоҳанд. Дар баробари ин, ҳатто сарватмандтарин гурезаҳо ҳар моҳ 500 евро кӯмакпулӣ мегиранд.
Акс: аз манбаъҳои кушода
