Бар асари задухӯрд дар ҷараёни интихоботи мунисипалӣ дар Туркия ду нафар ба ҳалокат расиданд. Дар ин бора расонаҳои Туркия рӯзи 31 март хабар доданд.
Ба гузориши хабаргузории Anadolu, яке аз ин ҳодисаҳо дар вилояти Диёрбакри ҷанубу шарқи кишвар рух додааст. Дар яке аз маҳаллаҳо баҳси интихоби раиси маҳалла ба занозанӣ печида, дар пайи он сангу чӯб ва ҳатто силоҳи оташфишон истифода шудааст.
Дар ҷараёни даргирӣ як нафар кушта ва 11 шаҳрванди дигар захмӣ шуданд. Мошини ёрии таъҷилие, ки ба ҷои ҳодиса расида буд, низ аз сангҳои партофташуда осеб дидааст.
Ба гузориши хабаргузории “Сабах”, дар вилояти ғарбии Бурса низоъи дигари хунин рух додааст. Юсуф Йигити 32-сола ба ҷои яке аз ду хешовандаш, ки ба вазифаи раиси деҳа пешбарӣ шуда буд, аз номзади алтернативӣ пуштибонӣ кард. Ин ба амакбачаҳои ӯ маъқул нашуд ва хешовандашро парронданд.
Дар ин бархӯрд ду нафари дигар, аз ҷумла як кӯдаки сесола ҷароҳат бардоштаанд.
Акс: аз манбаъҳои кушода
