20 апрели соли 2024 бахшида ба Рӯзи Пойтахти Ҷумҳурии Тоҷикистон ниммарафони XIV байналмилалии Душанбе баргузор мегардад. Ин чорабинӣ ба шарофати қарори раиси шаҳри Душанбе имконпазир гардид.
Ба иттилои манбаъ, озмуни байналмилалӣ бо ҳадафи таҳкими робитаҳои ҳамкорӣ бо бародаршаҳрҳо ва шаҳрҳое, ки бо шаҳри Душанбе ҳамкориҳои судманди иҷтимоиву иқтисодӣ доранд, баргузор мешавад.
Ёдовар мешавем, ки 15 апрели соли 2023 бахшида ба таҷлили Рӯзи пойтахти Тоҷикистон – шаҳри Душанбе ниммарафони XIII байналмилалӣ дар сатҳи баланд баргузор гардид. Дар ин мусобиқа беҳтарин варзишгарон аз бародаршаҳрҳо ва шаҳрҳое, ки бо шаҳри Душанбе ҳамкориҳои тиҷоратию иқтисодӣ доранд, аз қитъаҳои гуногун: Аврупо, Амрико, Африқо ва Осиё ширкат доштанд.
Илова бар ин, бахшида ба Рӯзи пойтахт дар баробари ниммарафони Душанбе дигар мусобиқоти варзишӣ, барномаҳои фарҳангиву иҷтимоӣ ва мусобиқаҳо баргузор мешаванд.
Дар ин бора ба АМИТ «Ховар» бо истинод ба Мақомоти иҷроияи ҳокимияти давлатии шаҳри Душанбе хабар медиҳад.
Акс: аз архив
