Тоҷикистон ба рушди ҳамкориҳо бо Русия дар сатҳи минтақавӣ манфиатдор аст ва таъсиси корхонаҳои муштаракро муҳим медонад. Дар ин бора дар дафтари матбуоти сарвари ҷумҳурӣ дар паи мулоқоти раисиҷумҳури Тоҷикистон Эмомалӣ Раҳмон бо волии вилояти Свердловск Евгений Куйвашев хабар доданд.
«Зимни суҳбат пешвои миллат муҳтарам Эмомалӣ Раҳмон ҳавасмандии ҷониби Тоҷикистонро ба густариши рӯзафзуни муносибатҳои ду кишвар, аз ҷумла ҳамкориҳо дар сатҳи минтақавӣ ҳамчун ҷузъи муҳими онҳо таъкид намуданд. Сарвари давлат дар ин замина қайд кард, ки имрӯз беш аз 80 субъекти Федератсияи Русия бо Тоҷикистон робитаи мустақим доранд», — гуфта мешавад дар хабар.
Раҳмон қайд кард, ки вилояти Свердловск дар миёни шарикони Тоҷикистон дар Русия мавқеи муҳимро ишғол мекунад ва «ҷониби Тоҷикистон омода аст пешниҳодҳои раиси вилояти Свердловскро оид ба ҳамкориҳои мутақобилан судманд дар тамоми соҳаҳои манфиатҳои тарафайн баррасӣ намояд». Президент ҳамчунин гуфт, ки густариши ҳамкориҳои сармоягузорӣ ва ҳамкории мутақобила дар масъалаи таъсиси корхонаҳои муштаракро муҳим мешуморад.
Эмомалӣ Раҳмон ҳамчунин бо раиси вилояти Русия масъалаҳои фаъолияти меҳнатии шаҳрвандони ҷумҳурӣ дар Федератсияи Русия ва самтҳои ояндадори ҳамкорӣ – энергетика, дорусозӣ ва сайёҳӣ баррасӣ шуд.
ТАСС хабар медихад.
Акс: АМИТ «Ховар»
