Эмомалӣ Раҳмон, раисиҷумҳури Тоҷикистон, пешниҳод кард, ки дар чаҳорчӯби Барномаи вижаи СММ барои иқтисоди Осиёи Марказӣ (СПЕКА) дар Душанбе як маркази рушди зеҳни сунъӣ таъсис шавад. Дар ин бора хадамоти матбуотии сарвари давлат хабар дод.
«Самти дигари муҳими ҳамкорӣ дар доираи барномаи СПЕКА дар давраи оянда метавонад ҷорӣ намудани зеҳни сунъӣ бошад. Мо пешниҳод мекунем, ки дар пойтахти Тоҷикистон маркази СПЕКА оид ба рушди зеҳни сунъӣ таъсис дода шавад», — хадамоти матбуот суханони сарвари давлатро аз суханрониаш дар нишасти вижаи барномавӣ дар Боку истинод мекунад.
Ба гуфтаи ӯ, ҷузъи ҷудонашавандаи рушди иқтисодии кишварҳои ширкаткунандаи барномаи вижа истифодаи густурдаи технологияҳои рақамӣ мебошад. Тавре Президент қайд кард, дар ҷумҳурӣ Стратегияи рушди интеллекти сунъӣ то соли 2040 қабул шудааст. Сарвари давлат ҳамчунин иттилоъ дод, ки дар Тоҷикистон барои тадриҷан рақамикунонии тамоми бахшҳои иқтисод, идораи давлатӣ ва соҳибкорӣ талошҳо идома дошта, консепсия ва барномаи рушди иқтисоди рақамӣ қабул шудааст.
Ҳамзамон Эмомалӣ Раҳмон пешниҳод кард, ки ҳамкориҳои кишварҳои СПЕКА дар самти рақамисозии табодули чандмодалии маълумот ва ҳуҷҷатҳо дар масирҳои транзитӣ дар долонҳои нақлиётии минтақавӣ фаъол карда шавад. Президент омодагии Тоҷикистонро барои ҳамкорӣ дар соҳаи тиҷорати электронӣ ҷиҳати ҳифзи ҳуқуқ ва манфиатҳои иштирокчиёни он изҳор намуд. «Дар ин замина мо андешидани чораҳои заруриро ҷиҳати татбиқи лоиҳаҳои муштарак оид ба таъсиси паркҳои технологӣ ва омода кардани мутахассисони соҳибихтисос дар соҳаи технологияҳои иттилоотӣ мувофиқ мешуморем», — афзуд роҳбари Тоҷикистон.
ТАСС хабар медихад.
Акс: Хадамоти Матбуоти Президенти Ҷумҳурии Тоҷикистон
