Дирӯз дар Минск ҷаласаи муштараки Шӯрои вазирони корҳои хориҷӣ, Шӯрои вазирони дифоъ ва Кумитаи котибони шӯроҳои амниятии Созмони Паймони Амнияти Дастаҷамъӣ (СПАД) баргузор гардид, ки дар он ҳайати Ҷумҳурии Тоҷикистон ширкат дошт.
Ҷумҳурии Тоҷикистонро дар ин ҷаласа вазирони корҳои хориҷӣ – Сироҷиддин Муҳриддин, дифоъ – Шералӣ Мирзо ва дабири Шӯрои амният Насрулло Маҳмудзода намояндагӣ карданд.
Сарони ҳайатҳо дар бораи вазъи низомиву сиёсӣ дар минтақаҳои амнияти дастаҷамъии СПАД табодули афкор намуда, маълумотро оид ба самтҳои афзалиятноки фаъолият дар давраи раёсати СПАД дар Ҷумҳурии Қазоқистон шуниданд. Ҳамчунин тарҳи Эъломияи Шӯрои амнияти дастаҷамъии СПАД ва феҳристи тасмимҳои сарони давлатҳо ҳамчун асос пазируфта шуданд.
Сироҷиддин Муҳриддин мавқеи Ҷумҳурии Тоҷикистонро оид ба таҳкими ҳамкориҳои сиёсӣ ва мавқеъгирии байналмилалии СПАД, рушди ҳамкориҳои низомӣ, низомию иқтисодӣ ва низомию техникӣ, инчунин вазъи Афғонистон ва таъсири он ба амнияти кишварҳои Минтақаи амнияти дастаҷамъии Осиёи Марказӣ дар СПАД.
Дар натиҷаи ҷаласаи муштарак Изҳороти вазирони корҳои хориҷии кишварҳои узви СПАД дар бораи равишҳои умумӣ барои таъмини амнияти фазои Авруосиё дар шароити нави низомию сиёсӣ қабул гардид.
Имрӯз, 23 ноябр дар Минск ҷаласаи навбатии Шӯрои амнияти дастаҷамъии СПАД баргузор мешавад.
Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар додааст.
Акс: аз манбаъҳои кушода
