Олимпиадаи ҷаҳонии астрономия дар шаҳри Сочии Федератсияи Русия аз 14 то 22 ноябр баргузор мешавад, ки дар он намояндагони 14 кишвар ширкат кардаанд. Дар мусобиқаи зеҳнӣ 79 нафар аз Русия, Перу, Эрон, Беларус, Тоҷикистон, Узбакистон, Венесуэла ва ҳафт кишвари дигар шахсан ва ба таври фосилавӣ ширкат карданд.
Барои нахустин бор мактаббачагони тоҷик Ҷумҳурии Тоҷикистонро дар Олимпиадаи ҷаҳонии астрономия намояндагӣ карданд. Олимпиада дар чор давра: давраҳои мушоҳидавӣ, амалӣ, назариявӣ ва экспресс баргузор гардид. Се нафар мактаббачагони литсейи хонандагони болаёқати ноҳияи Сино иштирок намуда, соҳиби як ҷойи 2, як ҷойи 3 ва як ҷойи ифтихорӣ гардиданд.
Олимпиадаи кушодаи байналмилалии астрономия (OWAO 2023) имрӯз ба анҷом мерасад, ғолибон бо медалҳо сарфароз гардонида мешаванд ва имкони шиносоӣ бо инфрасохтори кайҳонии Федератсияи Русияро пайдо мекунанд.
Дар ин бора ба АМИТ «Ховар» бо истинод ба Маркази ҷумҳуриявии ошкор ва рушди истеъдодҳои Вазорати маориф ва илми Ҷумҳурии Тоҷикистон хабар медиҳад.
Акс: Маркази ҷумҳуриявии кашф ва рушди истеъдодҳо
