Роҳбарони сохторҳои наҷотдиҳии кишварҳои Осиёи Марказӣ ба Дабири кулли СММ Антониу Гутерриш барои эҷоди як системаи огоҳсозии бармаҳал аз ҳолатҳои фавқулодда дар минтақа муроҷиат намуда, инчунин тасмим гирифтанд, ки атласи рақамии хатарҳои фаромарзӣ эҷод кунанд. Дар ин бора аз Кумитаи ҳолатҳои изтирории назди ҳукумати Тоҷикистон хабар доданд.
«Аз рӯи ҷамъбасти ҳамоиши минтақавӣ – ҷаласаи сарони вазоратҳои ҳолатҳои фавқулоддаи кишварҳои Осиёи Марказӣ, муроҷиати роҳбарони сохторҳои изтирорӣ ба Дабири кулли СММ оид ба масъалаи ташкили низоми минтақавии огоҳсозии бармаҳал ва иттилооти мутақобила дар бораи таҳдид ва ба вуҷуд омадани ҳолатҳои фавқулоддаи фаромарзӣ баррасӣ ва тасдиқ гардида, ташаббуси эҷоди атласи рақамии хатарҳои фаромарзӣ», — гуфта мешавад дар хабар.
Қайд карда мешавад, ки платформаи интерактивии Қазоқистон барои пайгирии хатарҳо ҳамчун намуна барои атлас истифода мешавад.
Дар ин конфронс аз Тоҷикистон раиси ин кумита Рустам Назарзода ширкат дошт. Зимни суханронӣ ӯ қайд кард, ки тағирёбии иқлим ба давлатҳои минтақа хатар дорад. «Афзоиши ғайримуқаррарии ҳарорати ҳаво дар Осиё аз сатҳи миёнаи ҷаҳонӣ зиёдтар аст. Оқибатҳои манфии ин раванд, аз қабили хушксолӣ, обхезӣ, ярч ва сӯхтор дар манотиқи мухталифи ҷаҳон, аз ҷумла Тоҷикистон, падидаҳои хеле нигаронкунанда буда, боиси талафоти ҷонӣ ва хисороти зербиноӣ мешаванд», — омадааст дар паём.
ТАСС хабар медихад.
Акс: АМИТ «Ховар»
