Созишнома миёни Донишгоҳи давлатии омӯзгории Тоҷикистон ба номи Садриддин Айнӣ ва Шӯрои амрикоӣ оид ба таҳсилоти байналмилалӣ ба имзо расид.
Созишномаи мазкур ба муаллимони забони англисӣ, донишҷӯён ва мутахассисони ҷавон дастрасӣ ба маводи омӯзиши забони англисӣ ва инчунин омӯзиш дар барномаҳои монанди FLEX, TEA, Maskie, JFDP ва барномаҳои шабеҳро фароҳам меорад.
Тавре қаблан хабар дода шуда буд, миёни Донишгоҳи давлатии омӯзгории Тоҷикистон ба номи Садриддин Айнӣ ва Донишкадаи омӯзгории Аркалики ба номи И.Алтинсарини Ҷумҳурии Қазоқистон созишномаи ҳамкорӣ ба имзо расид.
Ҳадафи созишнома рушди табодули таҷриба байни омӯзгорон ва фарогирии донишҷӯён ба омӯзиш, фаъолияти муштараки илмӣ, ташкил ва баргузории конфронсҳо, нашри маводи илмӣ ва дигар чорабиниҳои ҷонибҳо мебошад.
Донишгоҳи давлатии омӯзгории Тоҷикистон ба номи Садриддин Айнӣ дар ҳоли ҳозир бо 104 муассисаи олии касбии ватаниву хориҷӣ дар самтҳои илмию таълимӣ, табодуливу фарҳангӣ ҳамкориҳои судманд анҷом дода, ният дорад, ки дар оянда ҳамкориҳоро бо донишкадаҳои кишварҳои ҷаҳон густариш диҳад.
Дар ин бора АМИТ «Ховар» бо истинод ба Донишгоҳи давлатии омӯзгории Тоҷикистон ба номи Садриддин Айнӣ.
Акс: Донишгоҳи давлатии омӯзгории Тоҷикистон ба номи Садриддин Айнӣ
