Миёни Кумитаи рушди сайёҳии назди Ҳукумати Ҷумҳурии Тоҷикистон ва маҷаллаи «Diplomatic world» Ёддошти тафоҳум дар бораи табодули таҷриба ва эътирофи иқтидори истифоданашудаи сайёҳии Тоҷикистон ба имзо расид.
Имрӯз дар Кумитаи рушди сайёҳии назди Ҳукумати Ҷумҳурии Тоҷикистон раиси Кумита Камолиддин Мӯъминзода бо роҳбари маҷаллаи «Diplomatic world» Барбара Дитрих мулоқот намуда, дар рафти вохӯрӣ масъалаҳои таҳкими ҳамкорӣ дар самти пешбурд ва тарғиби имкониятҳои сайёҳии кишвар баррасӣ шуд.
Ҷонибҳо ҳамчунин доир ба таҳкими ҳамкорӣ дар самти пешбурд ва ҳавасмандгардонии имкониятҳои сайёҳии кишвар, аз ҷумла мавзеъҳои таърихӣ, имкониятҳои сайёҳии экологӣ ва дигар мавзеъҳои сайёҳии Тоҷикистон ҳарф заданд.
Гуфта мешавад, ки нашр, таблиғ ва ташвиқи пешрафту имкониятҳои сайёҳии Тоҷикистон дар маҷаллаҳои бонуфузи байналмилалӣ метавонад барои ҷалби бештари таваҷҷуҳи сайёҳон ба ҷумҳурӣ мусоидат кунад.
Дар ин бора ба АМИТ «Ховар» бо истинод ба Кумитаи рушди сайёҳӣ хабар медиҳад.
Акс: Кумитаи рушди сайёҳии назди Ҳукумати Ҷумҳурии Тоҷикистон
