Никол Пашинян, нахуствазири Арманистон ва Илҳом Алиев, раиси ҷумҳури Озарбойҷон, рӯзи 5 октябр дар Гранадаи Испания мулоқот мекунанд. Дар ин бора 24News бо истинод ба Шӯрои амнияти Арманистон хабар медиҳад.
Барои омодагӣ ба ин нишаст, дабири Шӯрои амният Армен Григорян бо як сафари корӣ ба Брюссел (Белгия) меравад. Рӯзи 26 сентябр ӯ бо Ҳикмет Ҳоҷиев, мушовири раисиҷумҳури Озарбойҷон дар умури сиёсати хориҷии Озарбойҷон мулоқот карда, ҷузъиёти музокироти ҷонибҳоро баррасӣ хоҳад кард.
Гуфта мешавад, ки Григорян дар пойтахти Белгия ҳамчунин бо мушовирони раисиҷумҳури Фаронса Эммануэл Макрон, садри аъзами Олмон Олаф Шолс ва раиси Шӯрои Иттиҳодияи Аврупо Чарлз Мишел мулоқот хоҳад кард.
Акс: аз манбаъҳои кушода
