Дар мактаби варзишии ноҳияи Ёвон ҷашнвораи бозиҳои миллии варзишӣ таҳти унвони «Намудҳои варзиши миллӣ – рукни асосии фарҳанги миллӣ» баргузор гардид. Чорабинӣ ба 32-умин солгарди Истиқлолияти давлатии Ҷумҳурии Тоҷикистон бахшида шудааст.
Ҷашнвора бо иштироки омӯзгорону мураббиён, донишҷӯён ва варзишгарони муассисаҳои омодагии варзишии вилоят доир гардида, дар маҳалҳо 8 намуди бозиҳои миллии варзишӣ намоиш дода шуд.
Рушди варзиш, аз ҷумла намудҳои миллии он дар кишвар таҳти ҳидояти пайвастаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон қарор дорад.
Бояд гуфт, ки дар солҳои истиқлолият бозиҳои миллии варзишӣ эҳё шуда, дар манотиқи мухталифи Тоҷикистон бо шеваҳои вижаи миллӣ баргузор мешаванд.
Ҳадаф аз баргузории ҷашнвора эҳёи бозиҳои миллии варзишӣ ва ба ин васила муаррифии фарҳангу тамаддун ва таърихи халқи тоҷик дар арсаи байналмилалӣ мебошад.
Дар ин бора ба АМИТ «Ховар» бо истинод ба Мақомоти иҷроияи ҳокимияти давлатии ноҳияи Ёвон хабар медиҳад.
Акс: Мақомоти иҷроияи ҳокимияти давлатии ноҳияи Ёвон
