Давлати Тоҷикистон барои беҳбуди таъмини нерӯи барқи пойтахт Душанбе ва манотиқи ҷумҳурӣ аз Ожонси Тавсеъаи Байналмилалии Амрико (USAID) ба маблағи 6,5 миллион доллар таҷҳизоти барқӣ дарёфт кард. Дар ин бора Далер Ҷумъа, вазири энержӣ ва захоири оби Тоҷикистон дар маросими таҳвили таҷҳизот ба хабарнигорон хабар дод.
Интиқоли 59 контейнер бо трансформатор ва дигар таҷҳизот дар як зеристгоҳи шимолии Душанбе бо иштироки Мануэл Микаллер, сафири Амрико дар Тоҷикистон сурат гирифт. «Дар доираи ҳамкориҳои ҳукумати Тоҷикистон ва ҳукумати ИМА мо шоҳиди дарёфти кӯмаки техникӣ дар шакли таҷҳизот барои шабакаҳои интиқоли барқ ҳастем, ки арзиши таҷҳизоти гирифташуда 6,5 миллион долларро ташкил медиҳад», — гуфт вазир.
Номбурда қайд кард, ки зеристгоҳе, ки трансформатор қабул кардааст, нисфи шаҳри Душанберо бо барқ таъмин мекунад. «Таҷҳизот ба мо имкон медиҳад, ки таъминоти барқи шаҳри Душанберо беҳтар созем ва инчунин ба мо имкон медиҳад, ки эътимоднокии тамоми системаи таъмини барқ дар Тоҷикистон, аз ҷумла самаранокии энергетикии онро беҳтар созем», — гуфт Далер Ҷумъа.
Тарҳи минтақавии CASA-1000 насби хатҳои интиқоли барқ байни Тоҷикистон, Қирғизистон, Афғонистон ва Покистонро барои содироти нерӯи барқ пешбинӣ мекунад. Дарозии умумии ин хатҳо 1227 километр хоҳад буд, ки арзиши он қаблан беш аз 1 миллиард доллар арзёбӣ шуда буд.
ТАСС хабар медихад.
Акс: аз манбаъҳои кушода
