Беш аз 90 дарсади тоҷиконе, ки дар хориҷ ба иттиҳоми ҷиноятҳои марбут ба маводи мухаддир боздошт шудаанд, дар Русия ҳастанд. Дар ин бора Ҳабибулло Воҳидзода, директори Агентии назорати маводи нашъаовари назди президенти Тоҷикистон дар нишасти матбуотӣ хабар дод.
«Тибқи маълумоте, ки ҳоло дар даст дорем, дар се моҳи соли ҷорӣ 308 шаҳрванди Тоҷикистон дар хориҷ аз кишвар боздошт шуда, ҳаҷми умумии маводи мухаддири мусодирашуда аз онҳо 90 килоро ташкил медиҳад. Аз ин шумор 287 нафар дар Русия боздошт шудаанд», — Ҳабибулло Воҳидзода гуфт.
Вай зикр кард, ки аз тоҷикони боздоштшуда дар Русия ҳудуди 50 кг маводи мухаддир мусодира шудааст. Ҳамчунин, ба гуфтаи ӯ, дар Узбакистон 9 шаҳрванди ҷумҳурӣ боздошт шуда, аз онҳо ҳудуди 41 кг маводи мамнӯъ мусодира ва 12 нафари дигар дар Қазоқистон боздошт шудаанд.
Воҳидзода зикр кард, ки оҷонсӣ пайваста бо Вазорати корҳои дохилии Русия, табодули иттилооти оперативӣ ҳамкорӣ мекунад. «Мо соли равон бо ҳамкорони худ аз Вазорати корҳои дохилии Русия як амалиёти муштарак гузаронидем, мо низ нақшаҳо дорем, ки ҷузъиёти онҳоро ҳанӯз ифшо накардаем», — хулоса кард директори агентӣ.
ТАСС хабар медихад.
Акс: аз манбаъҳои кушода
