Русия ва Тоҷикистон дар мавриди бунёди бинои нави театри ба номи Владимир Маяковский дар Душанбе ба мувофиқа расидаанд, ки ин кор дар якҷоягӣ бо як ширкати Федератсияи Русия анҷом мешавад. Дар ин бора ба рӯзноманигорон вазири фарҳанги ҷумҳурӣ Зулфия Давлатзода хабар дод.
«Сохтмони бинои нави Театри давлатии драмавии ба номи Владимир Маяковский пешбинй шудааст. Он дар ҳамкорӣ бо як ширкати Федератсияи Русия ва Раёсати сохтмони иншооти давлатии Дастгоҳи иҷроияи президенти Тоҷикистон сохта мешавад. Ҷои сохтмон интихоб шуда, тарафҳо ба мувофиқа расидаанд ва онҳо (тарафи Русия) онро ба мақсад мувофиқ донистанд», — гуфт Давлатзода зимни посух ба суол дар бораи дурнамои ҳамкорӣ бо Русия.
Вай гуфт, ки дар ҳамкориҳои фарҳангии Русия ва Тоҷикистон “ҳеҷ мушкиле” вуҷуд надорад. «Русия шарики стратегии мост, русҳо ҳамкасбони мо ва мо минбаъд низ равобити худро инкишоф медиҳем. Ҳунармандони Федератсияи Русия барои кор дар театрҳои мо ҷалб шудаанд ва мо ин ҳамкориро идома медиҳем», — афзуд вазир.
Бинои кӯҳнаи Театри драмавии ба номи Маяковский дар Душанбе соли 2016 тахриб шуда буд. Вазорати корҳои хориҷии Русия баъдан қайд кард, ки онҳо ба мақомот умед доранд, ки барои идомаи кори дастаи театр чора андешанд.
ТАСС хабар медихад.
