Имрӯз дар Вазорати рушди иқтисод ва савдо бо иштироки роҳбарияти вазорату идораҳои дахлдор ҷаласа баргузор гардид, ки дар он намояндагони Иттиҳоди Аврупо Барномаи нави бисёрсолаи индикативии Иттиҳоди Аврупоро барои солҳои 2021-2027 муаррифӣ намуданд.
Дар вохӯрӣ ба иштирокчиён муаррифии муфассали Барномаи нави бисёрсолаи индикативии Иттиҳоди Аврупо барои солҳои 2021-2027 пешниҳод карда шуд, ки дар он самтҳои нави ояндадори ҳамкориҳои бисёрҷониба, аз ҷумла маориф ва тандурустӣ, рушди иқтисоди сабз ва рақамӣ, расонидани кумакҳои техникӣ, таъсиси ҷойҳои нави корӣ ва мусоидат ба ҳалли мушкилоти экологӣ баррасӣ шуданд.
Таъкид шуд, ки Иттиҳодияи Аврупо дар чаҳорчӯби барномаи қаблии худ барои солҳои 2014-2020 ба Тоҷикистон 251 миллион евро ва ҳамчунин бо назардошти густариши пандемияи коронавирус ба бахшҳои иҷтимоӣ 48 миллион евро кумаки бебозгашт ҷудо кардааст.
Пас аз анҷоми чорабинӣ ҷонибҳо ба мувофиқа расиданд, ки густариши минбаъда ва истифодаи самараноки ҳамкориҳои бисёрҷониба дар бахшҳои мухталифи иқтисодиётро идома диҳанд.
Дар ин бора ба АМИТ «Ховар» бо истинод ба вазорат хабар медиҳад.
Акс: аз манбаъҳои кушода
