Бо ташаббуси Мақомоти иҷроияи ҳокимияти давлатии ноҳияи Синои шаҳри Душанбе бори нахуст дар панҷ маҳаллаи сераҳолии ноҳия қуттиҳои партовгоҳ барои зарфҳои пластикӣ насб карда шуд. Интизор меравад, ки чунин қуттиҳо дар дигар ҷойҳои серодам низ насб карда шаванд.
Ҳоло ин қуттиҳои партовгоҳҳои зарфҳои пластикӣ дар паҳлӯи «Боғи ҳайвонот», «Кули ҷавонон», «Кохи Наврӯз» ва Филармонияи давлатӣ гузошта шудаанд. Ин қуттиҳо махсус барои зарфҳои пластикӣ пешбинӣ шудаанд. Ҳадаф аз гузоштани чунин қуттиҳо нигоҳ доштани тозагии маҳал, ҷамъоварӣ ва коркарди зарфҳои пластикӣ ва коҳиш додани таъсири манфии зарфҳои пластикӣ ба табиат мебошад.
Зарфҳо дар шакли зарфҳои пластикӣ сохта шудаанд, ки таваҷҷуҳро ба худ ҷалб мекунад ва метавонад барои баланд бардоштани огаҳии сокинони маҳал мусоидат кунад.
Масъалаи таҳияи қуттии махсус барои зарфҳои пластикӣ ва насби он дар ҷойҳои серодам як моҳ қабл дар ҳукумати ноҳияи Синои пойтахт матраҳ шуда буд, ки ҳоло ин иқдом амалӣ мешавад.
Дар ин бора ба АМИТ «Ховар» бо истинод ба Мақомоти иҷроияи ҳокимияти давлатии ноҳияи Сино хабар медиҳад.
Акс: аз манбаъҳои кушода
