Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Президенти Ҷумҳурии Ӯзбекистон, муҳтарам Шавкат Мирзиёев барқияи шодбошӣ ирсол намуда, дар он гуфта мешавад:
«Муҳтарам Шавкат Миромонович!
Табрикоти самимии моро ба муносибати пирӯзии боварибахшатон дар интихоботи Президенти Ҷумҳурии Ӯзбекистон қабул фармоед.
Натиҷаҳои ин рӯйдоди муҳими сиёсӣ далели равшани нуфузи баланд, эътимод ва дастгирии қавии Шумо аз роҳи стратегии Шумо, ки ба модернизатсияи прогрессивии иҷтимоию иқтисодии Ӯзбекистон ва пайваста таҳкими мавқеи он дар арсаи байналмилалӣ нигаронида шудааст, мебошад.
Саҳми калони шахсии Шуморо дар таъмини рушди босуръати муносибатҳои дӯстӣ, ҳамсоягии нек ва ҳамкориҳои гуногунҷанбаи Тоҷикистону Ӯзбекистон таъкид намуда, ба таҳкими ҳамаҷониба ва ғанӣ гардонидани онҳо бо мазмуни нави амалӣ таваҷҷӯҳи самимии худро изҳор менамоям.
Итминон дорам, ки ману шумо дар оянда низ саю кушиши муштаракро барои пешбурди самарабахши шарикии стратегӣ ва ҳамкории иттифоқчии ду кишвар мутобиқи манфиатҳои бунодии халқамон мекунем.
Ба шумо, муҳтарам Шавкат Миромонович, саломатии бардавом, комёбиҳои нав ва иҷрои бомуваффақияти тамоми нақшаҳоятон ба нафъи пешрафти бемайлони Ӯзбекистони дӯст ва ба халқи бародари ӯзбек сулҳи абадӣ, саодатмандӣ ва шукуфоӣ орзумандам».
Акс: аз манбаъҳои кушода
