Рӯзи 29 июн дар Муассисаи давлатии «Боғи фарҳангу фароғати ба номи Абулқосим Фирдавсӣ»-и шаҳри Душанбе сайри шаҳрии Фестивали яхмос, дугоба, шарбат ва нӯшокиҳои спиртӣ баргузор гардид.
Дар чорабинии мазкур роҳбарияти мақомоти иҷроияи ҳокимияти давлатии шаҳри Душанбе ва минтақаҳои он, инчунин намояндагони корхонаҳои истеҳсолии пойтахт ширкат варзиданд.
Дар оғози чорабинӣ иштирокчиён ва меҳмонони фестивал аз намоишгоҳи маҳсулот, аз ҷумла, яхмос, дугоба, афшураҳои меваҳои гуногун, ки дар даромадгоҳи Боғи фарҳангу фароғати ба номи Абулқосим Фирдавсӣ ба маърази тамошо гузошта шуда буданд, дидан намуда, беҳтарин маҳсулотро муайян намуданд.
Муовини раиси шаҳри Душанбе Сиҷоуддин Саломзода қайд кард, ки фестивал бо мақсади баланд бардоштани иқтидори истеҳсолӣ дар пойтахт ва беҳтар намудани сифати маҳсулоти ватанӣ баргузор мешавад.
Пас аз шиносоӣ бо маҳсулоти ба намоиш гузошташуда ғолибони фестивал муайян гардида, намояндагони Мақомоти иҷроияи ҳокимияти давлатии шаҳри Душанбе дар вазъияти тантанавӣ ғолибон ва иштирокчиёни фаъолро бо диплом, сипоснома ва туҳфаҳои хотиравӣ қадрдонӣ намуданд.
Дар ин бора ба АМИТ «Ховар» бо истинод ба Мақомоти иҷроияи ҳокимияти давлатии шаҳри Душанбе хабар медиҳад.
Акс: аз манбаъҳои кушода
