Мизи мудаввар бахшида ба рӯзи байналмилалии мубориза бо маводи мухаддир, ки 26 июн таҷлил мешавад, дар маркази ҷумҳуриявии иммунопрофилактикаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон баргузор гардид.
Тавре, ки дар маркази Матбуотии Вазорати тандурустӣ ва ҳифзи иҷтимоии аҳолии кишвар хабар дода шуд, дар чорабинӣ намояндагони вазорату сохторҳои дахлдор, коршиносон, шарикони рушд, намояндагони созмонҳои ҷамъиятӣ ва васоити ахбори омма ширкат варзиданд.
Таъкид гардид, ки талошҳои Ҳукумати мамлакат бо роҳбарии асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Муҳтарам Эмомалӣ Раҳмон оид ба муборизаи глобалии зидди маводи мухаддир, расонидани кӯмак ва мусоидат ба созмонҳои ҷаҳонӣ дар пешгирии ин бемории аср хеле назаррас мебошанд.
Зикр гардид, ки Ҷумҳурии Тоҷикистон дар баробари дигар давлатҳо дар мубориза бо маводи мухаддир устувор буда, корҳои дар ин самт анҷомдодашуда пеш аз ҳама ба манфиати амният ва саломатии ҷомеа равона карда шудаанд.
Нашъамандӣ инчунин душмани тарзи ҳаети солим ба ҳисоб меравад ва пешгирии ин вабои аср пеш аз ҳама тавассути баланд бардоштани маърифати тиббии аҳолӣ, ҳамкории судманд бо сохторҳои масъул ва шарикони рушд ба даст оварда мешавад.
Акс: аз манбаъҳои кушода
