5 июн дар Душанбе мулоқоти Президенти Ҷумҳурии Тоҷикистон Муҳтарам Эмомалӣ Раҳмон бо ноиби президенти бонки Ҷаҳонӣ оид ба минтақаи Аврупо ва Осиеи Марказӣ Антонелла Бассани баргузор гардид, хабар медиҳад хадамоти матбуоти сарвари давлат.
Дар мулоқот масъалаҳои вазъи кунунӣ ва дурнамои ҳамкории Тоҷикистон бо бонки Ҷаҳонӣ баррасӣ шуданд.
Президенти мамлакат Муҳтарам Эмомалӣ Раҳмон аз сатҳи ҳамкории Тоҷикистон ва бонки Ҷаҳонӣ дар тӯли 30 соли шарикӣ изҳори қаноатмандӣ намуданд, аз ҷумла ин ниҳоди молиявӣ барои татбиқи 116 лоиҳа дар соҳаҳои гуногуни давлати мо беш аз 2,7 миллиард доллари амрикоӣ ҷудо кардааст.
Хонум Антонелла Бассани дар бораи имкониятҳои назарраси Тоҷикистон дар истеҳсол ва содироти нерӯи барқи тоза ва барқароршаванда ва дар ин замина иқтисоди «сабз» едовар шуда, бори дигар омодагии бонки Ҷаҳониро ҷиҳати дастгирии саҳми Тоҷикистон дар рӯзномаи ҷаҳонии тағйиребии иқлим тасдиқ намуд.
Дар мулоқот Антонелла Бассани изҳор дошт, ки бори аввал пас аз таъин шуданаш ба мақоми ноиби президенти бонки Ҷаҳонӣ дар Минтақаи Аврупо ва Осиеи Марказӣ ба Тоҷикистон сафар кардааст. Ин сафар дар доираи чорабинии таърихӣ-30-солагии муносибатҳои шарикии байни Ҳукумати Ҷумҳурии Тоҷикистон ва бонки Ҷаҳонӣ сурат мегирад.
Акс: Хадамоти Матбуоти Президенти Ҷумҳурии Тоҷикистон
