Дар Қасри Миллатҳо 1 июн Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Президенти Федератсияи байналмилалии дзюдо Мариус Визерро ба ҳузур пазируфтанд.
Дар мулоқот дурнамои ҳамкориҳои Кумитаи миллии олимпии Тоҷикистон, Федератсияи дзюдои Тоҷикистон ва Федератсияи байналмилалии дзюдо баррасӣ шуд.
«Мо тарафдори ҳамкории самарабахш бо Федератсияи байналмилалии дзюдо ҳастем» — таъкид кард Сарвари давлат Эмомалӣ Раҳмон. Ҳамчунин дар вохӯрӣ изҳори боварӣ карда шуд, ки ҳамкорӣ дар оянда низ идома ёфта, дзюдои тоҷик дар арсаи байналмилалӣ ба натиҷаҳои баланди варзишӣ ноил мегардад.
Ҷонибҳо аз сатҳи кунунии ҳамкориҳои Тоҷикистон ва Федератсияи байналмилалии дзюдо изҳори қаноатмандӣ карданд.
Таъкид гардид, ки Гран-при Душанбе-2023, мусобиқаи сатҳи баланд, ки аз ҷониби Федератсияи дзюдои Тоҷикистон барои нахустин бор дар пойтахти кишвар баргузор мешавад, натиҷаҳои хуб медиҳад.
Дар мусобиқаи сатҳи баланди байналмилалии Гран-При Душанбе-2023, ки ба муносибати 50-умин солгарди таъсиси Федератсияи дзюдои Тоҷикистон баргузор мешавад, 500 варзишгар аз 45 кишвари ҷаҳон ширкат мекунанд.
Ҳамчунин зикр гардид, ки шаҳри Душанбе барои баргузории ин мусобиқаи сатҳи баланди байналмилалии варзишӣ омода аст, Ҳукумати ҷумҳурӣ барои рушди як намуди варзиш, чун дзюдо тамоми чораҳоро меандешад.
Зимни мулоқот ҷонибҳо ҳамчунин доир ба масъалаҳои дигари рушди ҳамкориҳо дар ин навъи варзиш суҳбати судманд анҷом доданд.
Дар ин бора ба АМИТ «Ховар» хабар медидад.
АКС: аз манбаъҳои кушода
