Дар Тоҷикистон мусобиқаи чорумин чемпионати Ассотсиатсияи футболи Осиёи Марказӣ (CAFA) байни дастаҳои ҷавонони то 20-сола ба анҷом расид. Дар натиҷаи ин мусобиқа мунтахаби ҷавонони Тоҷикистон таҳти раҳбарии сармураббӣ Раҳматулло Фузайлов барандаи медали биринҷӣ гардид.
Дастаи ҷавонони Тоҷикистон (U-17) дар даври ниҳоӣ аз тими ҷавонони Эрон бо ҳисоби 1:2 шикаст хӯрд. Дар ҳайати дастаи мо Беҳрӯз Хуҷаев гол зад.
Дар вохӯрии дигари даври чорум мунтахаби Узбакистон бар тими Афғонистон бо ҳисоби 4:0 пирӯз шуд.
Ҳамин тариқ, мунтахаби Узбакистон барандаи чемпионати ҷавонони CAFA-2023 гардид, ки дар чаҳор бозии анҷомшуда 10 имтиёз ба даст овард. Медалҳои нуқра насиби тими Эрон шуд, ки 9 имтиёз дорад. Сегонаи беҳтаринро тими ҷавонони Тоҷикистон бастааст. Аз рӯи натоиҷи мусобиқот шогирдони Раҳматулло Фузайлов 5 имтиёз доранд. Дар чамъбасти мусобика командаи мо бар командаи Туркманистон (4:2) галаба карда, бо командахои Афгонистон (1:1) ва Узбекистон (1:1) мусобиқа карданд.
Дар маросими супурдани ҷоизаҳо ба ғолибону ҷоизадорони чемпионати ҷавонони CAFA-2023 ноиби президенти Федератсияи футболи Тоҷикистон Дилшод Ҷӯразода ва дабири кулли Ассотсиатсияи футболи Осиёи Марказӣ Улуғбек Каримов ширкат доштанд.
Пас аз ҷамъбасти мусобиқа ҷоизаи Fair Play насиби тими Афғонистон, ҷоизаи махсус насиби тими Туркманистон гардид. Голзани беҳтарини мусобиқот насиби бозигари тими миллии Эрон Ризо Мирзоён шуд, ки шаш гол зад. Ва фоидаовартарин бозигари чемпионати ҷавонони CAFA-2023 капитани мунтахаби Узбакистон Муҳаммадалӣ Уринбоев дониста шуд.
Дар ин бора ба АМИТ «Ховар» бо истинод ба Федератсияи футболи Тоҷикистон хабар медиҳад.
АКС: Федератсияи футболи Тоҷикистон
