Рӯзи 21 май бахшида ба Рӯзи ҷавонони Тоҷикистон, ки ҳамасола дар ҷумҳурӣ 23 май таҷлил мешавад, дар вилояти Суғд дави миллӣ баргузор мешавад.
Чорабинии варзишӣ дар маркази вилоят – шаҳри Хуҷанд рӯзи 21 май, соати 07:00 дар Маҷмааи ҳавзҳои «20-солагии Истиқлолияти Тоҷикистон» қад-қади кӯчаи Раҳим Халил то хиёбони Раҳмон Набиев оғоз мешавад.
Дар ҳамин ҳол, бо назардошти рушди густурдаи велосипедронӣ дар кишвар ва ҷалби васеи аҳолӣ ба он, рӯзи 21 май, қабл аз оғози Дави миллӣ, баргузории марафони велосипедронӣ дар назар аст.
Мақсад аз баргузории мусобиқа таҳкими тарзи ҳаёти солим, рушду густариши варзиш ва оммавӣ гардонидани он дар байни аҳолӣ мебошад.
Дави миллӣ маъракаи умумиҷумҳуриявӣ буда, бо мақсади беҳбуд бахшидан ва оммавигардонии варзиш ташкил карда шуда, тибқи Фармони Президенти Ҷумҳурии Тоҷикистон аз 28 марти соли 2007 «Дар бораи Рӯзи дави миллӣ» ҳамасола дар ҷумҳурӣ якшанбеи сеюми моҳи май гузаронида мешавад.
Дар ин бора АМИТ «Ховар» бо истинод ба дафтари матбуоти раиси вилояти Суғд хабар медиҳад.
Акс: Хадамоти матбуоти раиси вилояти Суғд
