Оҷонсии ИМА оид ба рушди байналмиллалӣ (USAID) аз оғози лоиҳаи нави панҷсола бо номи Рушди бозори деҳот (MDRD) ба маблағи 19 миллион доллар хабар дод. Дафтари матбуоти сафорати ИМА дар Тоҷикистон хабар медиҳад, ки лоиҳа тамоми кишварро фаро гирифта, ҳадафи он суръат бахшидан ба рушди бахши кишоварзӣ тавассути фароҳам овардани дастрасии ҳамаҷониба ба имкониятҳои иқтисодӣ дар ҷамоатҳои деҳот мебошад.
«Лоиҳаи MDRD ба таври устувор баланд бардоштани некӯаҳволии иқтисодии деҳқонон, ҷавонон ва занони иштирокчии бозори кишоварзии Тоҷикистон мебошад», — дар хабар гуфта мешавад.
«Лоиҳаи мазкур ба ҳадафҳои барномаи нави ҳукумати Тоҷикистон оид ба рушди устувори системаҳои кишоварзӣ мутобиқ буда, ба табдили заминаи иқтисодии Тоҷикистон аз аграрӣ ба агросаноатӣ мусоидат хоҳад кард.» — гуфт сафири ИМА дар Тоҷикистон Мануэл Микаллер.
Сильвия Дж. Мегрет — Роҳбари ташкилоти ғайритиҷоратии амрикоии рушди байналмилалии ACDI/VOCA қайд кард, ки лоиҳа ба татбиқи қарорҳои бозор дар сатҳи маҳаллӣ мусоидат хоҳад кард.
АКС: аз манбаъҳои кушода
