Ҳайати дастаи мунтахаби дзюдои Тоҷикистон барои ширкат дар мусобиқоти қаҳрамонии ҷаҳон-2023, ки аз 7 то 14 майи соли ҷорӣ дар Қатар дар шаҳри Доҳа баргузор мешавад, тасдиқ шуд.
Тибқи низомнома, дар чемпионат варзишгароне, ки то 3 апрел ба 100 рейтинги беҳтарини ҷаҳон шомил шудаанд, метавонанд ширкат варзанд.
Чемпионати ҷаҳон оид ба дзюдо дар соли 2023 дар доираи сафари ҷаҳонии дзюдо баргузор мешавад. Ғолибону ҷоизадорони чемпионат бо мукофотҳои қимматбаҳои пулӣ сарфароз гардонида мешаванд. Фонди ҷоизаи чемпионат 1 миллион евроро ташкил медиҳад. Дар рақобатҳои инфиродӣ ғолибон дар ҳамаи 14 вазн ба ҳар кадом 26 ҳазор евро, барандагони медалҳои нуқра – 15 ҳазор евро, барандагони медалҳои биринҷӣ – 8 ҳазор евро мукофотонида мешаванд. Дар сабқати дастаӣ барои ҷои аввал 90 000 евро, барои ҷои дуюм 60 000 евро ва барои ҷои сеюм 25 000 евро пешбинӣ шудааст.
Варзишгарон инчунин барои беҳтар кардани мавқеъашон дар рейтингҳои ҷаҳонӣ ва олимпӣ холҳо мегиранд. Аз ҷумла барои ғолибон 2000 имтиёз, барандагони ҷои дуюм 1400 имтиёз, барои ҷойи сеюм 1000 имтиёз ва ҳамин тавр барои иштирок 20 имтиёз мегиранд.
Дар ин бора АМИТ «Ховар» бо истинод ба Федератсияи дзюдои Тоҷикистон хабар дод.
Акс: Федератсияи дзюдои Тоҷикистон
