Ширкати ҳавопаймоии «Сомон Эйр» имрӯз, 9-уми март нахустин парвози мустақими мунтазамро дар масири «Душанбе – Ҷидда – Душанбе» анҷом медиҳад.
Бино ба иттилоъи маркази матбуъотии ин ширкат, парвозҳо аз Душанбе ба Ҷидда (Арабистони Саудӣ) ҳар ҳафта рӯзҳои панҷшанбе ва якшанбе анҷом дода мешаванд. Вақти парвоз рӯзҳои панҷшанбе аз Душанбе соати 14:30, аз Ҷидда – 19:30, рӯзи якшанбе аз Душанбе – 22:30, аз Ҷидда – 04:00 (субҳи душанбе) ба вақти маҳаллӣ.
Ҳамчунин, рӯзҳои сешанбе ҳавопаймоҳо аз Хуҷанд ба Ҷидда парвоз хоҳанд кард. Вақти парвоз аз Хуҷанд соати 21:00, ба самти муқобил – 02:00 (шаби чоршанбе). Вақти парвоз аз Тоҷикистон 5 соату 15 дақиқа, дар бозгашт 4 соату 30 дақиқа аст. Ҳама парвозҳо дар ҳавопаймоҳои Boeing 737-800 ва Boeing 737-900 анҷом дода мешаванд.
