Дар қаламрави Афғонистон ҳудуди 6500 нафар аз ҷангҷӯёни созмони террористии ДИИШ мустақар ҳастанд, ки ҳудуди 4000 нафари онҳо дар марзҳои ҷанубии Тоҷикистон қарор доранд. Дар ин бора раиси ситоди муштараки Созмони Паймони Амнияти Дастаҷамъӣ (СПАД) Анатолий Сидоров хабар дод.
«Дар ҳоли ҳозир шумори бахши афғонистонии “Давлати исломӣ” ба таври қобили мулоҳиза афзуда, ҳудуди 6,5 ҳазор ҷангҷӯро ташкил медиҳад, ки то 4 ҳазор нафари онҳо дар марзҳои ҷанубии Тоҷикистон мутамарказанд.», — РИА Новости аз суханони ӯ истинод мекунад.
Сидоров таъкид кард, ки террористон таҳдиди аслӣ ба суботи минтақаи Осиёи Марказӣ мебошанд.
Созмони Паймони Амнияти Дастаҷамъӣ ҳамчунин изҳор дошт, ки вазъ дар минтақаи масъулияти ин созмон мушкил ва муташанниҷ боқӣ мемонад.
