2 феврал дар ҳудуди ҷамоати деҳоти Хистеварз ноҳияи Б.Ғафуров Музокироти намояндагони вилояти Суғди Тоҷикистон ва вилояти Ботканди Қирғизистон баргузор гардид.
Тибқи иттилои хадамоти матбуотии раиси вилояти Суғд, ҳайатҳои тарафҳоро сардори вилояти Суғди Тоҷикистон Раҷаббой Аҳмадзода ва намояндаи ваколатдори президенти Қирғизистон дар вилояти Ботканд Абдукарим Алимбоев роҳбарӣ мекарданд.
Ҳамчунин дар музокирот фармондеҳони қӯшунҳои сарҳадии Тоҷикистону Қирғизистон Раҷабалӣ Раҳмоналӣ ва Уларбек Шаршиев, намояндагони мақомоти ҳифзи ҳуқуқ ва мақомоти амниятии ду вилоят, сардорони шаҳру ноҳияҳои наздисарҳадӣ, намояндагони аҳолинишини наздисарҳадӣ иштирок намуданд.
Дар натиҷаи гуфтушунидҳо ҷонибҳо дар бораи зарурати пурзӯр намудани корҳои фаҳмондадиҳӣ байни аҳолии наздисарҳадии вилояти Суғди Ҷумҳурии Тоҷикистон ва вилояти Ботканди Ҷумҳурии Қирғизистон ба мувофиқа расиданд.
