Ба ин муносибат дирӯз дар Душанбе созишномаи меҳнатӣ миени Федератсияи муборизаи варзишии Тоҷикистон ва мураббии нави дастаи мунтахаб — паҳлавони маъруфи озод, барандаи медали нуқраи бозиҳои олимпии Пекин дар соли 2008, қаҳрамони Осие дар соли 2003 Ва медали нуқраи чемпионати ҷаҳон дар соли 2007 дар ҳайати дастаи мунтахаби Тоҷикистон Юсуф Абдусаломов ба имзо расид.
Номзадии Юсуф Абдусаломов ба вазифаи мураббии дастаи мунтахаби кишвар оид ба муборизаи озод аз ҷониби роҳбарияти федератсияи муборизаи варзишии Тоҷикистон тасдиқ карда шуд.
28-29 январ дар қасри теннис ва варзиши обии шаҳри Душанбе дар сатҳи баланд чемпионати Ҷумҳурии Тоҷикистон оид ба мубориза (сабкҳои озод ва юнонӣ-римӣ) байни калонсолон баргузор гардид. Ғолибон ва беҳтарин паҳлавонони чемпионат имкони дохил шудан ба дастаи мунтахаби миллии Тоҷикистонро пайдо карданд.
Чемпионатро барандаи медали нуқраи Олимпиадаи соли 2008 оид ба муборизаи озод дар ҳайати мунтахаби Тоҷикистон, собиқ мураббии дастаҳои мунтахаби Полша ва Маҷористон Юсуф Абдусалом роҳбарӣ намуд.
АМИТ «Ховар» бо истинод ба федератсияи муборизаи варзишии Тоҷикистон хабар медиҳад.
АКС: Федератсияи муборизаи варзишии Тоҷикистон
