Тибқи маълумоти Созмони Ҷаҳонии Беҳдошт, тақрибан 2 миллиард нафар (беш аз 1 миллиарду 971 миллион нафар) вазни зиёдатӣ ва 671 миллион нафар фарбеҳӣ доранд. Ҳар сол 2,8 миллион нафар аз фарбеҳӣ мефавтанд.
Барои ҳалли ин мушкилот дар Тоҷикистон «Барномаи пешгирии фарбеҳӣ ва ташаккули ғизои солим дар Ҷумҳурии Тоҷикистон барои солҳои 2019-2024 амалӣ карда мешавад.» Дар ин бора АМИТ «Ховар» бо истинод ба Азизулло Шарифов, директори Муассисаи давлатии «Маркази ҷумҳуриявии ғизо»-и Вазорати тандурустӣ ва ҳифзи иҷтимоии аҳолии кишвар хабар медиҳад.
Азизулло Шарифов изҳор дошт, ки рафти рушди иқтисод дар солҳои охир дар ғизои аҳолӣ тағйироти ҷиддие ба амал овард, ки истеъмоли ками нахи парҳезӣ ва истеъмоли зиёди хӯрокҳои тез ва равғанин, нӯшокиҳои газдори қанд ва танҳо шакарро дар бар мегирад ва ба инкишофи бемориҳои музмини ғайрисироятӣ ва фарбеҳӣ мусоидат кард.
Ба гуфтаи коршинос, ғизо яке аз омилҳои муҳими таъсиргузор ба саломатӣ, фаъолият, рушди зеҳнӣ ва ҳолати ҷисмонӣ ва давомнокии умр аст. Тибқи маълумоти Созмони Ҷаҳонии Беҳдошт, 80 дарсади бемориҳо дар ҷаҳон аз ташкили нодурусти вазъи ғизо ба вуҷуд омада, дар соҳаи тиб мушкилоти зиёдеро ба вуҷуд меорад.
