Дар Конибодом бо мақсади кам кардани партоби моддаҳои зараровар ё олудакунанда ба атмосфера рейди экологии «Ҳавои тоза» баргузор гардид. Чорабинии мазкур аз ҷониби кормандони Раёсати мониторинги муҳити зист бо мусоидати сохторҳои Вазорати корҳои дохилии Тоҷикистон дар шоҳроҳи марказии шаҳри Конибодом то ҷамоати Патар баргузор гардид. Бино ба иттилоъи дафтари матбуъотии Сарраёсати экология, дар ҷараёни амалиёт 40 адад мошинҳои тамғаи мухталиф санҷида шуданд.
«Дар натиҷа нисбати 6 нафар ронандагоне, ки дар ҳолати корношоямии воситаҳои нақлиёт ва вайрон кардани стандарти давлатӣ қарор доштанд, протоколҳои ҳуқуқвайронкунии маъмурӣ тартиб дода шуданд», – омадааст дар хабар.
Қобили зикр аст, ки яке аз ифлоскунандаҳои асосии ҳаво зарраҳои PM2.5 мебошанд, ки аз газҳои ихроҷи мошинҳо, сӯзонидани ҳезум ва ангишт дар танӯрҳо, истеҳсоли семент ва маснуоти сафолӣ, аз истифодаи маводи кимиёвӣ дар саноати кишоварзӣ ба атмосфера ворид мешаванд. . Сарчашмаҳои PM2.5 инчунин падидаҳои табиӣ мебошанд: тӯфонҳои чангу қум, сӯхторҳои ҷангал.
Қаблан маълум шуд, ки Тоҷикистон қасд дорад дар 30 соли ахир партоби газҳои гулхонаӣ ба ҳадди ақаллро коҳиш диҳад.
АКС: аз манбаъҳои кушода
