Соли оянда Русия ҳаҷми интиқоли маҳсулоти нафтиро ба Тоҷикистон бидуни боҷ афзоиш медиҳад. Муовини вазири энержӣ ва манобеъи оби Тоҷикистон Шарифа Худобахш ва муъовини аввали вазири энержии Русия Павел Сорокин дар пайи як дидор дар Маскав санади ислоҳи ҷадвали интиқоли маҳсулоти нафтиро имзо карданд. Дар ин бора ба АМИТ «Ховар» хабар медиҳад.
Зимни мулоқот ҷонибҳо масъалаҳои марбут ба таъмини навъҳои асосии маҳсулоти нафтӣ барои соли 2023-ро баррасӣ карданд.
Тоҷикистон аз соли 2013 ба таври имтиёзнок (бидуни пардохти боҷи гумрукии содиротӣ) маводи сӯхт ва маводи молидании Русияро дарёфт мекунад. Қайд мешавад, ки шарти асосии таъмини имтиёзноки маҳсулоти нафтии Русия истиснои реэкспорт ба кишварҳои сеюм аст.
