Русия, Қазоқистон ва Узбакистон тарҳи иттиҳодия дар бахши газро баррасӣ мекунанд. Дар марҳилаи аввал сухан дар бораи таъсиси механизми ҳамоҳангсозӣ бо ташаббуси президенти Русия Владимир Путин меравад, гуфт котиби матбуотии ӯ Дмитрий Песков рӯзи сешанбе ба хабарнигорон.
Дар бораи «иттифоқи сеҷониба» бори нахуст раисиҷумҳури Қазоқистон Қосим-Ҷомарт Тоқаев зимни сафари рӯзи 28 ноябр ба Маскав ёдовар шуд. Баъдан маълум шуд, ки сухан дар бораи ҳамкорӣ дар соҳаи коркард ва интиқоли газ, аз ҷумла ба самтҳои нави содиротӣ меравад.
Дафтари матбуоти Тоқаев хабар дод, ки дар музокирот дар Кремл «сухан дар бораи таъсиси «иттиҳоди сеҷонибаи газ»-и иборат аз Русия, Қазоқистон ва Узбакистон меравад». Ҳадафи лоиҳа бояд ҳамоҳангсозии «амалҳо ҳангоми интиқоли гази Русия тавассути қаламравҳои Қазоқистон ва Узбакистон» бошад. Ҷойҳои таъинот номида нашудаанд.
Муовини нахуствазири Русия Александр Новак гуфт: «Русия, Қазоқистон ва Узбакистон воқеан аз замони Шӯравӣ системаи ягонаи интиқоли газро доранд ва ҳоло барои ҳамкориҳои мутақобила дар ин замина, аз ҷумла интиқол ва коркарди газ имконоти бузург вуҷуд дорад». «Аслан, ин аллакай барои интиқол ба дигар самтҳои содиротӣ, масалан, ба Чин анҷом дода мешавад. Ҳама чизро бояд ҳамчун ҳамкориҳои иловагӣ баррасӣ кард», – таъкид кард муовини сарвазир.
